.jpg)
बैतडीको पुर्चौडी नगरपालिका–४, चनकिल्लीका हिमालय बोहराको घर पहिरोले पुरिएको छ ।
अविरल वर्षासँगै खसेको पहिरोले बोहराको तीनतले घर पूर्ण रूपमा क्षति भएको जिल्ला प्रहरी कार्यालयका प्रवक्ता एवं प्रहरी निरीक्षक बल्देव बडुले जानकारी दिए । पहिरो खस्न लागेको थाहा भएपछि परिवारका सबै सदस्य घरबाहिर निस्केकाले मानवीय क्षति नभएको उनले बताए ।
बोहराको गोठमा बाँधिएको एउटा भैँसी, पाडो र बाख्रो पहिरोले पुरिएको प्रहरी निरीक्षक बडुले जानकारी दिए । घरभित्रका अन्नपात, लत्ताकपडालगायत सबै सामग्री नष्ट भएको उनले बताए ।
घटनास्थलमा खटिएको प्रहरी टोली र स्थानीयले पहिरो पन्छ्याउने कार्य गरिरहेका छन् । पहिरोले घर पुरिँदा भएको क्षतिको विस्तृत विवरण संकलन भइनसकेको प्रहरी निरीक्षक बडुले जानकारी दिनुभयो ।
बोहराको ११ जनाको परिवार हाल छिमेकी मोतीराम बोहराको घरमा बसिरहेको छ ।
प्रतिक्रिया दिनुहोस्
.jpeg)
.gif)
