 (1).gif "machhapuchhre bank")
अमेरिकी राष्ट्रपति डोनाल्ड ट्रम्पले आफ्नो सामाजिक सञ्जाल प्लेटफर्म ट्रुथ सोसलमा आर्टिफिसियल इन्टेलिजेन्स (एआई) बाट निर्मित एक नयाँ भिडियो सार्वजनिक गरेका छन् ।
यस ९० सेकेन्डको भिडियोमा ट्रम्पले आफूलाई एक चिकित्सकको रूपमा प्रस्तुत गर्दै ‘ट्रम्प डिरेन्जमेन्ट सिन्ड्रोम’ (टीडीएस) को उपचार गरिरहेको देखाइएको छ । ‘टीडीएस’ ट्रम्पले आफ्ना विरोधी र राजनीतिक शत्रुहरूलाई होच्याउन प्रयोग गर्ने एउटा चर्चित पदावली हो ।
‘डिपफेक’ प्रविधि प्रयोग गरी बनाइएको यस भिडियोमा राष्ट्रपति ट्रम्प सेतो मेडिकल कोटमा सजिएका छन् । उनले भिडियोमा आफूलाई ‘डाक्टर ट्रम्प’को रूपमा चिनाउँदै टीडीएसका लक्षणहरूबाट पीडित भएकाहरूका लागि विशेष उपचार योजना ल्याएको बताएका छन् ।
भिडियोको सुरुमा उनले भनेका छन्,‘के तपाईं वा तपाईंले चिनेको कोही व्यक्ति टीडीएसबाट ग्रसित हुनुहुन्छ ? यसका लक्षणहरू निकै कष्टकर हुन सक्छन् । सौभाग्यवश, म डाक्टर ट्रम्प हुँ र मसँग यसको उपचार योजना छ ।’
यस भिडियोको रोचक पक्ष के छ भने, यसमा ट्रम्पका कट्टर आलोचक मानिने हलिउड स्टारहरू रोबर्ट डी निरो, जुलिया रोबट्र्स, एडवर्ड नोर्टन, जोन लेगुइजामो र टेलिभिजन प्रस्तोता वुपी गोल्डवर्ग तथा रोजी ओडोनेलका एआई अवतारहरू समावेश गरिएको छ । भिडियोमा यी कलाकारहरूले काल्पनिक उपचारपछि आफूलाई सन्चो भएको भन्दै प्रशंसा गरिरहेको देखाइएको छ । एउटा पात्रले भन्छ, ‘म एक दशकभन्दा बढी समयदेखि पीडित थिएँ, तर डाक्टर ट्रम्पलाई सुनेपछि मैले सुधार महसुस गरिरहेको छु ।’
भिडियोको अन्त्यमा ट्रम्पले बिरामीहरूलाई सल्लाह दिँदै भनेका छन,‘उपचार सरल छ । झूटो समाचार हेर्न बन्द गर्नुहोस, प्रार्थना गर्नुहोस् र यदि तपाईंलाई कहिल्यै तनाव महसुस भयो भने म जस्तै डाइट कोक पिउनुहोस्, तपाईंको जीवनमा उल्लेखनीय परिवर्तन आउनेछ ।’
ट्रम्पले पछिल्लो समय सामाजिक सञ्जालमा यस्ता धेरै एआई सामग्रीहरू पोस्ट गरिरहेका छन् । यसअघि उनले पोपकसँग जोडिएको एक विवादित एआई तस्बिर पनि साझा गरेका थिए, जसको व्यापक विरोध भएपछि हटाइएको थियो । यो नयाँ भिडियोले पनि अहिले अमेरिकामा ठूलो बहस र चर्चा पैदा गरेको छ ।
© 2026 All right reserved to nepalraibar.com
Design & Developed By 
चर्चित अपडेट
ताजा
