.png "ncell")
 (1).gif "machhapuchhre bank")
नेपाल राष्ट्र बैंकले बैंकिङ प्रणालीमा रहेको अधिक तरलता व्यवस्थापन गर्न ७० अर्ब रुपैयाँ बराबरको निक्षेप संकलन उपकरण जारी गर्ने भएको छ । राष्ट्र बैंकको मौद्रिक व्यवस्थापन विभागले बिहीबार सूचना जारी गर्दै ७७ दिन अवधिका लागि निक्षेप संकलन गर्न लागिएको जनाएको हो ।
राष्ट्र बैंकका अनुसार निक्षेप संकलनका लागि जेठ २२ गते दिउँसो ३ बजेसम्म अनलाइन बिडिङ सिस्टम सफ्टवेयरमार्फत बोलकबोल गर्न सकिनेछ । सोही दिन उपकरण निष्काशन गरिनेछ भने साँवा र ब्याजको भुक्तानी आगामी भदौ ५ गते गरिनेछ । निक्षेप संकलन उपकरणको ब्याजदर बोलकबोल प्रक्रियाबाट निर्धारण हुनेछ ।
बोलकबोलमा नेपाल राष्ट्र बैंकबाट इजाजतपत्र प्राप्त ‘क’, ‘ख’ र ‘ग’ वर्गका बैंक तथा वित्तीय संस्थाले मात्र सहभागिता जनाउन पाउनेछन् । न्यूनतम १० करोड रुपैयाँदेखि कुल आह्वान रकमसम्म बोल गर्न सकिनेछ । बोल रकम ५ करोड रुपैयाँले भाग गर्दा निःशेष भाग जाने गरी प्रस्ताव गर्नुपर्ने व्यवस्था गरिएको छ ।
राष्ट्र बैंकले निक्षेप संकलनको रकम बाँडफाँड गर्दा सबैभन्दा कम ब्याजदरलाई प्राथमिकता दिने जनाएको छ । समान ब्याजदरमा आएका प्रस्तावले निष्काशित रकम नाघेमा अनुपातिक आधारमा बाँडफाँड गरिनेछ । सम्पूर्ण वा आंशिक बोल स्वीकार वा अस्वीकार गर्ने अधिकार खुला बजार कारोबार सञ्चालन समितिमा रहनेछ ।
स्वीकृत बोलपत्रबापतको रकम सम्बन्धित बैंक तथा वित्तीय संस्थाको राष्ट्र बैंकस्थित खाताबाट कट्टा गरिनेछ । निष्काशनको दिन खातामा पर्याप्त मौज्दात नभए सम्बन्धित संस्थालाई कालोसूचीमा राखी आगामी बोलकबोलमा सहभागी हुन प्रतिबन्ध लगाइने राष्ट्र बैंकले जनाएको छ ।
राष्ट्र बैंकका अनुसार निक्षेप संकलन गरिएको रकम सम्बन्धित संस्थाको लगानी पोर्टफोलियोका रूपमा गणना हुनेछ । उक्त रकम अनिवार्य नगद मौज्दातमा गणना गर्न नपाइने भए पनि वैधानिक तरलता अनुपात र तरलता अनुपातमा भने गणना गर्न सकिनेछ ।
साथै, संकलित निक्षेप रकम भुक्तानी मिति अगावै फिर्ता वा अग्रिम भुक्तानी नहुने राष्ट्र बैंकले स्पष्ट पारेको छ । विस्तृत जानकारीका लागि मौद्रिक व्यवस्थापन विभागमा सम्पर्क गर्न सकिने जनाइएको छ ।
.gif "unitedajod")
© 2026 All right reserved to nepalraibar.com
Design & Developed By 
चर्चित अपडेट
ताजा
 (1) (1).gif "muktinath")
.png "tulsipur")
