.gif)
रामेछाप सदरमुकाम मन्थलीलाई खाँडादेवी, दोरम्बा शैलुङ र सुनापति गाउँपालिकासँग जोड्ने तथा काठमाडौं जाने वैकल्पिक सडकखण्डमा पर्ने भटौली खोलाको पक्की पुलको किनारमा खोलाले कटान गरेपछि सवारी आवागमन रोकिएको छ । मन्थली नगरपालिका–७ र खाँडादेवी गाउँपालिका–४ पकरबासलाई जोड्ने उक्त पुलको पकरबास पट्टीको भागमा खोलाले कटान गरेपछि शनिबार बिहानबाट आवागमन रोकिएको खाँडादेवी–४ का वडाध्यक्ष कृष्णप्रसाद पौडेलले जानकारी दिए ।
खोलाको बहावले पुलको पकरबासपट्टिको भागमा हान्दा सडकको भाग खोक्रो बनेको छ । ‘हाललाई दुई पाङ्ग्रे सवारी चल्न दिए पनि ठुला सवारी साधन चल्न सक्ने अवस्था छैन’, वडाध्यक्ष पौडेलले भने । पुलको भाग खोलाले खोल्न लागेपछि मर्मतको काम सुरु भएको भए पनि शुक्रबार राति आएको बाढीले त्यो बगाइदिएको पौडेलले जानकारी दिए । तत्काल मर्मत नगर्ने हो भने पुल नै जोखिममा रहेको उनले बताए ।
खोलाले पुल खोल्न लागेपछि यस अघि नै वडा कार्यालयले सम्बन्धित निकायमा पत्राचार गरेको थियो । तर समयमा नै काम सुरु नहुँदा थप क्षति भएको छ । ‘सुरुमा नै काम थाल्न पाएको भए यति क्षति हुने थिएन, जति ढिला ग¥यो त्यति धेरै क्षति हुने अवस्था छ’, उनले भने ।
भटौली खोलाको सो पक्की पुल रामेछापका तीनवटा गाउँपालिका जाने प्रमुख र काठमाडौं जाने रामेछापको वैकल्पिक यातायात सञ्जालमा महत्त्वपूर्ण मानिन्छ ।
गत वर्ष खुर्कोटको पुल बगाउँदा रामेछाप र दोलखा जाने गाडीले समेत यही बाटो प्रयोग गरेका थिए । अहिले पनि खुर्कोटको पुलबाट तार्न नमिल्ने ठुला सवारी साधनहरू यही बाटो हुँदै काठमाडौं र तराइबाट आउजाउ गर्ने गर्दछन् ।
.jpeg)
.gif)
