 (1).gif "machhapuchhre bank")
नेकपा (एमाले) ले पार्टीको जनपरिचालन कार्यक्रमअन्तर्गत आज देशका सबै ७५३ वटै स्थानीय तहमा जनप्रदर्शन कार्यक्रम सञ्चालन गर्दैछ।
पार्टीले प्रतिगामी षड्यन्त्रका विरुद्ध देशव्यापी जनपरिचालन गर्ने निर्णयअनुसार वडा, पालिका, जिल्ला र राष्ट्रिय तहमा चरणबद्ध रूपमा जनप्रदर्शन कार्यक्रम तय गरेको हो।
पार्टी प्रचार तथा प्रकाशन विभाग प्रमुख राजेन्द्र गौतमका अनुसार असोज २२ गते देशभरका ६ हजार ७ सय ४३ वटै वडामा वडाभेला सम्पन्न भइसकेका छन्। उक्त भेलामा भदौ २४ पछि विकसित राजनीतिक घटनाक्रम, संसद् विघटनको विवाद र एमालेको आगामी रणनीतिबारे कार्यकर्तालाई जानकारी दिइएको थियो।
गौतमका अनुसार, आजका कार्यक्रममा कतिपय पालिकाहरूले मोटरसाइकल र्यालीमार्फत शक्ति प्रदर्शन गर्दैछन् भने कतिपय स्थानमा नारा–जुलुससहित जनसभा र कोणसभा कार्यक्रम आयोजना गरिएको छ।
पार्टी केन्द्रले जनतालाई सचेत र सशक्त बनाउने नाराहरू तय गरेको छ। प्रदर्शनलाई प्रभावकारी बनाउन सहभागीहरूले एमालेको झण्डा सहित घना बस्ती भएका स्थानमा जनप्रदर्शन गर्ने, अन्त्यमा छोटो कोणसभा गर्ने र वर्तमान राजनीतिक अवस्थाबारे स्पष्ट पार्ने निर्देशन दिइएको छ।
एमालेले जनप्रदर्शनका तस्बिर, भिडियो र मुख्य विषयवस्तु सामाजिक सञ्जाल र सञ्चार माध्यममा प्रसारण गर्न सबै सदस्यलाई निर्देशन गरेको छ।
आजको जनप्रदर्शन कात्तिक २९ गते हुने जिल्ला स्तरीय आमसभा, मंसिर ६ गते काठमाडौंमा हुने केन्द्रीय जनप्रदर्शन र आगामी महाधिवेशनको प्रचार अभियानको तयारीको रूपमा रहेको पार्टीले जनाएको छ।
© 2026 All right reserved to nepalraibar.com
Design & Developed By 
चर्चित अपडेट
ताजा
