.gif)
मोरङ प्रहरीले झारफुक गर्ने बहानामा एक बालिकालाई यौन दुर्व्यवहार गरेको आरोपमा विराटनगर–६ रामपुरका एक जनालाई पक्राउ गरेको छ । जिल्ला प्रहरी कार्यालय मोरङले बुधबार एक प्रेस विज्ञप्ति जारी गर्दै उक्त जानकारी दिएको हो ।
पक्राउ पर्नेमा विराटनगर–६ बस्ने ३५ वर्षीय महमद साबिर रहेको जिल्ला प्रहरी कार्यालय मोरङका प्रवक्ता तथा सूचना अधिकारी प्रहरी नायब उपरीक्षक वेद प्रकाश जोशीले जानकारी दिए । प्रहरीका अनुसार, पीडित बालिका विगत ६ महिनादेखि डराउने, आत्तिने, बेहोस हुने जस्ता समस्याबाट ग्रसित थिइन् । सोही क्रममा महमद साबिर धामी (झाँक्री/मलबी) भएको जानकारी पाई बिरामीको झारफुक गराउँदै आएको जाहेरवालाले बताएका छन् ।
झाँक्रीले झारफुक नगरे ज्यान नै जान सक्ने भन्दै थप उपचारका लागि ७० हजार रुपैयाँ माग गरेको र उक्त रकम दिइएको जाहेरीमा उल्लेख छ । बालिकले २०८१ पुस १७ गते रातिको समयमा उपचार गराउँदा निको हुने भनी आफ्नो घरमा बोलाई उपचारको बहानामा पीडित बालिकालाई यौन दुर्व्यवहार गरेको आरोप छ ।
यौन दुर्व्यवहार गरेपछि कसैलाई नभन्नु भनि धम्कीपूर्ण डरत्रास देखाई प्रतिवादी फरार भएको व्यहोरासहित पीडित बालिकाले मंगलबार जिल्ला प्रहरी कार्यालय मोरङमा जाहेरी दिएकी थिइन् । सोही जाहेरीका आधारमा झाँक्री महमद साबिरलाई विराटनगर–६ स्थित उनकै घरबाट पक्राउ गरी बाल यौन दुर्व्यवहार सम्बन्धी कसुरमा बुधबार मुद्दा दर्ता गरिएको छ ।
पक्राउ परेका महमद साबिरलाई अदालतबाट ७ दिनको म्याद थप गरी थप अनुसन्धान भइरहेको प्रहरीले जनाएको छ ।
.jpeg)
.gif)
