कोशी प्रदेशसभा सदस्य ललिताकुमारी चौधरीका छोरा १८ वर्षीय अक्षत माझीले चलाएको मोटरसाइकलले ठक्कर दिंदा पैदल हिंडिरहेका एक युवकको मृत्यु भएको छ । दुर्घटनामा घाइते झापाको चारआली घर भइ मोरङको बूढीगंगा गाउँपालिका–१ मा बस्दै आएका २४ वर्षीय आकाश मण्डलको बुधबार बिहान मृत्यु भएको हो ।
मोरङको ग्रामथान गाउँपालिका–४ घर भएका अक्षतले हाँकेको प्रदेश १–०२–०४४ प ८४४ नम्बरको मोटरसाइकलले ४ दिनअघि पैदल यात्रामा रहेका आकाशलाई ठक्कर दिएको थियो । गम्भीर घाइते आकाशलाई उपचारका लागि विराट शिक्षण अस्पताल भर्ना गरिएको थियो । नेमुवाबाट तीव्र गतिमा विराटनगरतर्फ हुइँकिएको मोटरसाइकलले कोशी राजमार्गअन्तर्गत बूढीगंगा–१ स्थित हिमगिरी साबुन फ्याक्ट्री अगाडि भदौ ५ गते शनिबार साँझ ७ः१० बजेतिर आकाशलाई ठक्कर दिएको थियो ।
बाटो काट्दै गर्दा दुर्घटनामा परेका आकाशको उपचारका क्रममा बुधबार बिहानका राति २ः३० बजेतिर मृत्यु भएको मोरङ प्रहरीका प्रवक्ता डीएसपी ज्ञानेन्द्रबहादुर बस्नेतले जानकारी दिए । बूढीगंगा–१ मा कोठा भाडामा लिएर बस्ने आकाश र उनकी पत्नी उषा तामाङ स्थानीय अमन होटलमा काम गर्थे ।
दुर्घटनामा मोटरसाइकल चालक अक्षत माझी पनि घाइते भएका छन् । टाउको, अनुहार, हात–खुट्टालगायत शरीरका विभिन्न भागमा चोट लागेका उनको विराटमै उपचार भइरहेको जानकारी डीएसपी बस्नेतले दिए । प्रहरीका अनुसार मोटरसाइकल चालक अक्षतसँग सवारी चालक अनुमति पत्र (लाइसेन्स) छैन । लाइसेन्स प्राप्त नगरिकन लापरबाहीपूर्ण तरिकाले मोटरसाइकल चलाउँदा दुर्घटना भएको प्रहरीको प्रारम्भिक अनुसन्धानबाट खुलेको छ । प्रहरीका अनुसार मोटरसाइकल अक्षतकै नाममा छ ।
‘बिना लाइसेन्सका मोटरसाइकल चालक सांसदका छोरा हुन् । अहिलेसम्म अस्पतालमै रहेका उनलाई जोगाउन अनेक चलेखल हुँदैछ,’ प्रहरी स्रोतले सुनायो । सत्ताको पहुँचका भरमा भित्रभित्रै घटनालाई मिलाउने र दबाउने प्रयास भइरहेको स्रोत बताउँछ । अक्षतविरुद्ध बुधबार जिल्ला प्रहरी कार्यालय मोरङमा किटानी जाहेरी परेको छ । मृतक आकाशका परिवारले सवारी ज्यान मुद्दामा दिएको जाहेरीका आधारमा घटनाको थप अनुसन्धान भइरहेको डीएसपी बस्नेतले बताए ।
उनका अनुसार शवको विराटनगरको कोशी अस्पतालमा पोस्टमार्टम गरिएको छ । परिवारका सदस्यले अन्त्येष्टिका लागि शव जिम्मा लिएर लगिसकेका छन् ।
© 2026 All right reserved to nepalraibar.com
Design & Developed By 
चर्चित अपडेट
ताजा
