 (1).gif "machhapuchhre bank")
राष्ट्रिय स्वतन्त्र पार्टी (रास्वपा) ले जेनजी सहिद रसिक खतिवडाकी आमा रचना खतिवडा क्षेत्रीलाई पनि समानुपातिक उम्मेदवारको सूचीमा राखेको छ। जेनजी आन्दोलनको क्रममा रसिकलाई भदौ २३ गते बानेश्वरमा भएको प्रदर्शन छाती र पेटमा गोली लाग्दा ज्यान गएको थियो।
रास्वपाले निर्वाचन आयोगमा बुझाएको समानुपातिक सूचीमा रचनाको नाम खस आर्य महिला क्लस्टरबाट नवौँ नम्बरमा राखिएको छ। रास्वपाले उक्त क्लस्टरमा प्रतिभा रावललाई पहिलो नम्बरमा राखेको छ।
त्यसपछि क्रमशः विद्षी राणा, लिमा अधिकारी (आचार्य), श्रद्धा कुँवर, समीक्षा बास्कोटा, टीका संग्रौला, क्रान्तिशिखा धिताल, मञ्जु भूसाललाई राखिएको छ। भुसालपछि खतिवडालाई रास्वपाले समानुपातिक सूचीमा राखेको हो।
खतिवडाले रास्वपा सभापति रवि लामिछानेले आफूलाई भेटेरै समानुपातिक सूचीमा बस्न भनेको बताएकी छन्।
रास्वपा समानुपातिकका अधिकांश उम्मेदवार चितवनबाट
रास्वपाको समानुपातिक सूचीमा एउटै जिल्लाबाट २१ जनाको नाम समावेश गरिएको छ। रास्वपाका सभापति रवि लामिछानेको निर्वाचन क्षेत्र समेत रहेको चितवनबाट २१ जनाको नाम बन्दसूचीमा समावेश गरिएको हो।
आदिवासी जनजातिमा ५ जना र खस आर्यमा १६ जनाको नाम समावेश गरिएको छ। आदिवासी जनजाति समूहमा रास्वपाले ३२ जनाको नाम समावेश गरेको छ। डा मनोहर प्रधान, विश्व राई, धर्मलाल तामाङ, टासी लाक्पा शेर्पा र सुदेश गुरुङ पनि छन्। उनीहरू सबै चितवनका हुन्।
यस्तै खस आर्य समूहमा ३२ जनाको नाम समावेश छ। तीमध्ये चितवनबाट १६ जनाको नाम समावेश छ। यो भनेको खस आर्य समूहको ५० प्रतिशत हो। १६ जनामध्ये ८ जना पुरुष र ८ जना महिला छन्। चितवनबाट खस आर्यमा सचिन ढकाल, सुदिप ढकाल, अनुपकुमार उपाध्याय, गोविन्द नारायण, दुर्गाबहादुर घिमिरे, जनक न्यौपाने, पवन शाही र टीकाराम दाहाल छन्। उपाध्याय कुलमान घिसिङ संरक्षक रहेको उज्यालो नेपाल पार्टीका अध्यक्ष पनि हुन्। उनको नाम कुलमानको कोटाबाट समावेश गरिएको हो।
यस्तै खस आर्य महिलामा विदुषी राणा, श्रद्धा कुँवर, मञ्जु भुसाल, रचना खतिवडा क्षेत्री, सिर्जना वली, सीतादेवी पाण्डे, सरला लामिछाने र प्रभा ढकाल छन्। रास्वपा अध्यक्ष लामिछाने गत निर्वाचनमा चितवन–२ बाट निर्वाचित भएका थिए। त्यस्तै, केन्द्रीय सदस्य हरि ढकाल चिवतन–१ बाट निर्वाचित भएका थिए।
© 2026 All right reserved to nepalraibar.com
Design & Developed By 
चर्चित अपडेट
ताजा
