.gif)
नवलपुरको कावासोती–९ की सीता जिसी राउतले कौसीमा ड्रागन खेती गरेर वार्षिक आठ लाख रुपैयाँसम्म आम्दानी गर्दै आएकी छिन् ।
तीनवटा बिरुवाबाट कौसीमा सुरुवात गरेको खेती सीताले हाल १३५ वटा गमलामा विस्तार गरेकी छिन् । उनले बारीमा ४२४ वटा बोट रोपेकी छिन् । घरमै खान भनेर चार वर्ष पहिले सुरु गरेको खेती अहिले व्यावसायिक बनेको छ ।
‘युट्युब’बाट हेरेर प्रभावित भएर उनले कौसीमा ड्रागन फल खेती सुरुवात गरेकी थिइन् । सुरुमा मलेसियन सी भेराइटीको जम्मा तीनवटा बिरुवा दुई हजार एक सय रुपैयाँमा पनौतीबाट ल्याएर लगाएकी थिइन् । कौसीमा खेती सुरु गर्दा २५ हजार रुपैयाँ लगानी लागेको उनले बताइन् । उनले फल मात्र होइन, बिरुवा पनि बिक्री गरेर आम्दानी गर्दै आएकी छिन् ।
'मैले सुरुमा आफ्नै लागि बिरुवा तयार गरेर लगाएँ, त्यसले राम्रो फल दियो । बिरुवा सफल भएपछि मैले बिरुवा बिक्री गर्न थालेँ, अहिले मकहाँ धेरै जना बिरुवा लिन आउनुहुन्छ । यसपालि करिब दुई लाख रुपैयाँको त बिरुवा नै बेचेँ,' उनले भनिन् ।
गत असार पहिलो सातादेखि उत्पादन सुरु भएकोमा तीन लट बिक्री गरी हाल चौथो लट टिप्न थालेकी छिन् । असार महिनामा मात्रै साढे तीन क्विन्टल ड्रागन फल बिक्री गरिसकेको उनले बताइन् । बजारका लागि कुनै समस्या नभएको उनको भनाइ छ । स्थानीय बजार र मुख्य शहरहरू नारायणगढ, काठमाडौंदेखि बुटवलसम्म उनले बिक्री गर्दै आएकी छिन् ।
पानीट्याङ्की राखेका फलामका डण्डी, छतमा प्रयोग भएको रेलिङले नै पिल्लरको काम गर्ने भएकाले कौसीमा लगानी कम लाग्ने, पात नहुँदा झरेर फोहोर हुने पिर नहुने, अनि धेरै घाम र थोरै पानी भए पुग्ने भएकाले कौसी खेतीका लागि ड्रागन फ्रुट खेती एकदमै उपयुक्त रहको जिसीको अनुभव छ ।
.jpeg)
.gif)
