.gif)
व्यवस्थापन संकायमा स्नातकोत्तर गरेका लमजुङको सुन्दरबजार नगरपालिका–९ का ५७ वर्षीय द्वारिका मिश्र अटो चलाउँछन् । राजनीति र समाजसेवा समेत गर्दै आएका उनले विगत दुई वर्षदेखि अटो चलाउन थालेका हुन् ।
नेपाल कम्युनिष्ट पार्टी (एमाले) सुन्दरबजार नगर कमिटी अध्यक्ष मिश्रले दैनिक खर्च कटाएर एक हजारदेखि एक हजार ५०० रुपैयाँसम्म कमाउने गरेको बताए ।
‘मलाई खानका लागि केही दुःख छैन तर पढे लेखेकाले अटो चालक बनेर स्वरोजगार बन्नु पर्छ, चालकहरूले यात्रुको मर्का बुझ्दैनन् । तिनलाई बुझाउन, श्रम विभाजन भयो भने घरमा झगडा हुन्छ तसर्थ श्रम गरियो भने त्यसले घरमा मेलमिलाप हुन्छ, आम्दानीको पाटो, समाजसेवा र राजनीतिमा टेवा पुग्ने उद्देश्यले अटो चलाउन थालेको हुँ,’ उनले भने ।
सुन्दरबजार र बेंसीसहरको रुटमा अटो चलाउने गरेको उनको भनाइ छ । बिहान ५÷६ बजेदेखि राति ८÷९ बजेसम्म अटो चलाउने र यसको अलावा पार्टीको काममा खटिने गरेको उनले बताए । उनले भने, ‘दैनिक सो समयमा अटो चलाउने गरे पनि आकस्मिक कसैले कतै पुर्याउन अनुरोध गरेमा राति १२-१ बजे पनि पुर्याउने गर्छु ।’
उनका एउटी छोरी अस्ट्रेलिया, अर्की छोरी बेलायत, एउटा छोरा पोखरामा शिक्षक र बुहारी बैंकमा कार्यरत छन् । घरमा आफू र श्रीमती मात्र रहेको उनले बताए । त्यसो त सुन्दरबजार क्षेत्रमा समाजसेवा र राजनीतिमा द्वारिकाको छवि राम्रो छ।
प्रष्ट वक्ता, सहयोगी भावना र लोकप्रियसमेत उनले राजनीतिको सुरुवात विसं २०३७ मा एमाले निकट भातृ संगठन अनेरास्ववियुमा आबद्ध हुँदै सुरु गरेका थिए । विसं २०५२/५३ मा एमाले परित्याग गरे । पछि नेपाली कांग्रेसमा आबद्ध हुँदै विसं २०६५-६६ तिर नगर सचिव, विसं २०७० मा वडा नागरिक मञ्च संयोजक, विसं २०७२ मा सुन्दरबजार नगर कमिटी सभापति भएका थिए । विसं २०७४ मा कांग्रेसबाट २०७४ को स्थानीय निर्वाचनमा मेयरको उम्मेदवार बन्ने चाहना राखे । पार्टीले टिकट नदिएपछि स्वतन्त्र उम्मेदवार बने । तर उनी पराजित भए ।
उनलाई कांग्रेसले कारबाही गरेपछि उनले स्वतन्त्र रूपमा संगठन बनाएर सुन्दरबजारमा उद्योग वाणिज्य संघ, खानेपानी जस्ता संघसंस्थाका निर्वाचनमा उनको समूह निर्णायक बन्यो । विसं २०७४ मा प्रतिनिधिसभा सदस्य निर्वाचनमा पनि मिश्रले स्वतन्त्र उम्मेदवारी दिए र पराजित भए । विसं २०७९ को स्थानीय निर्वाचनमा मिश्रले पुनः सुन्दरबजारको उपमेयरमा स्वतन्त्र उम्मेदवारी दिए । तर विजयी हुन सकेनन् ।
त्यसपछि विसं २०७९ साउनमा १५० जनासहित मिश्र एमालेमा प्रवेश गरे । सो पश्चात् नेकपा एमाले लमजुङको जिल्ला कमिटी सदस्य र सुन्दरबजार नगरको सहइन्चार्जको जिम्मेवारी प्राप्त गरे । पछि नगर कमिटीको निर्वाचनबाट अध्यक्ष पदमा निर्वाचित भए । सो यता नगर कमिटीको अध्यक्षको जिम्मेवारी सम्हाल्दै आएका छन् ।
राजनीतिक र सामाजिक रूपमा उनको छवि एकातिर छँदैछ, अहिले सुन्दरबजारमा अटो चलाउन थालेर उनले कर्मशील हुनुपर्छ भन्ने सन्देश प्रवाह गरेका छन् । बेरोजगार भएर पनि सानो तिनो काम नगर्ने बरु नराम्रै काम गरेर पैसा कमाउन खोज्नेहरूका लागि उनी उदाहरण बनेका छन् ।
विसं २०४१ मा एसएलसी पास गरेका उनले विसं २०५६ मै काठमाडौंको सरस्वती क्याम्पसबाट ‘एमबीए’ उत्तीर्ण गरेका उनले १७ वर्ष लमजुङका विभिन्न विद्यालयमा शिक्षण पेसा गरेका छन् ।
.jpeg)
.gif)
