.gif)
अमेरिकी राष्ट्रपति डोनाल्ड ट्रम्पले अफगानिस्तानका नागरिकलाई अमेरिका प्रवेशमा प्रतिबन्ध लगाएपछि यसको असर अफगानी क्रिकेटरलाई परेको छ ।
अमेरिकामा हुने मेजर लिग क्रिकेट (एमएलसी) मा खेल्ने अफगानी क्रिकेटर राशिद खान र नूर अहमद लगायत ७ खेलाडी एमएलसीमा आवद्ध छन् ।
ट्रम्पको घोषणाले १२ देशका नागरिकहरूको संयुक्त राज्य अमेरिकामा प्रवेश पूर्ण रूपमा प्रतिबन्धित गरेको छ । ट्रम्पले अफगानिस्तान, बर्मा, चाड, कंगो गणराज्य, इक्वेटोरियल गिनी, इरिट्रिया, हैटी, इरान, लिबिया, सोमालिया, सुडान र यमनमाथि प्रतिबन्ध लगाएका छन् ।
एमएलसी २०२५ को लागि सम्झौता अन्तर्गत सात अफगानिस्तान खेलाडीहरू राशिद खान, अज्मतुल्लाह ओमारजाई र नवीन-उल-हक एमआई न्यूयोर्कसँग, गुलबदिन नैब, फजलहक फारुकी र वकार सलामखिल सिएटल ओर्कास र नूर अहमद टेक्सास सुपर किंग्समा आवद्ध रहेका छन् ।
जुन ९ देखि लागु हुने प्रतिबन्धमा कुनै पनि खेलाडी वा एथलेटिक टोलीको सदस्य, विश्वकप, ओलम्पिक, वा राज्य सचिवले निर्धारण गरेको अन्य प्रमुख खेलकुद कार्यक्रमको लागि यात्रा गर्नेको लागि छुट हुने उल्लेख छ ।
मिडिया रिपोर्टका अनुसार केहि खेलाडीहरू भिसा प्राप्त गरेपछि पहिले नै संयुक्त राज्य अमेरिका पुगेका छन् भने केहि खेलाडीले अझै भिसा आवेदन दिन वा यात्रा गर्न बाँकी रहेको छ । लिगका अधिकारीहरुले विदेशमन्त्री मार्को रुबियोले खेलाडीहरुलाई अमेरिका आउन सहजीकरण गर्ने विश्वास व्यक्त गरेका छन् ।
आदेशले विशेष रूपमा २०२८ मा लस एन्जलसमा हुने ओलम्पिकलाई एउटा कार्यक्रमको रूपमा उल्लेख गरेको छ जसको लागि खेलाडीहरूलाई छुट दिइनेछ । त्यसैले, अफगानिस्तानले योग्यता हासिल गरेमा खेलकुदमा पुरुष टी-२० क्रिकेट प्रतियोगितामा प्रतिस्पर्धा गर्न योग्य हुनुपर्ने उल्लेख छ ।
एमएलसीको २०२५ सिजन जुन १२ देखि जुलाई १३ सम्म हुदै छ । एमएलसी २०२३ देखि शुरु भएको थियो । जसको पहिलो सिजन एमआई न्यूयोर्कले जितेको थियो भने दोस्रो सिजन गत बर्ष वाशिंगटन फ्रीडमले जितेको थियो ।
एमएलसीमा एमआई न्यूयोर्क, वाशिंगटन फ्रीडम, लस एन्जल्स नाइट राइडर्स, सान फ्रान्सिस्को युनिकोर्न, सीटल ओर्कास र टेक्सास सुपर किंग्स फ्रेन्चाईजी रहेका छन् ।
.jpeg)
.gif)
