विद्युतीय चुरोट (भेप) मार्फत भएको नौं किलो सुन तस्करी प्रकरणमा भन्सारका नायव सुब्बासहित ११ जनाविरुद्ध सम्पत्ति शुद्धीकरणको मुद्दा दर्ता भएको छ । जिल्ला सरकारी वकिलको कार्यालयले शुक्रबार त्रिभुवन अन्तर्राष्ट्रिय विमानस्थल भन्सार कार्यालयका नासु रेवन्त खड्कासहित ११ जनाविरुद्ध जिल्ला अदालत काठमाडौंमा मुद्दा दायर गरेको हो ।
सो प्रकरणमा मुछिएका दिनेश बस्नेत, अमृत कार्की, राम केशव थापा, ललिता थापा, वेदप्रकाश अग्रवाल, साहेब राव, पाण्डुरङ मरगले, राहुल भनिने रेशम महरा, दावा छिरिङ, रोजन राउत र प्रेरणा थापाविरुद्ध मुद्दा दर्ता भएको हो । उनीहरूविरुद्ध ८ करोड ५५ लाख २८ हजार ३७४ रुपैयाँ बिगो दाबी गरी हदैसम्मको सजाय माग गरी मुद्दा दर्ता गरिएको हो ।
यसअघि उनीहरूविरुद्ध सीआईबीले आपराधिक विश्वासघात र संगठित अपराधको कसुरमा मुद्दा चलाएको थियो । गत १६ भदौमा यो मुद्दाको फैसला भएको थियो । जसमा खड्कालाई दुई वर्ष ६ महिना कैद र २५ हजार जरिवाना, दिनेश बस्नेतलाई एक वर्ष ६ महिना कैल र १५ हजार जरिवाना, निर्मलकुमार विकलाई ६ महिना कैद र ५ हजार जरिवानाको फैसला सुनाइएको थियो ।
यस्तै वेदप्रकाश र साहेव रावविरुद्ध जनही ४५ हजार जरिवाना सुनाइएको थियो । दावा र राहुललाई जनही एक वर्ष दुई महिना कैदको फैसला सुनाइएको थियो । लोकेन्द्रलाई सफाइ दिइएको थियो । राम केशव र अमृतको जग्गा जफतको फैसला भएको थियो । भेपमार्फत् आएको सुन बेचेर जग्गा खरिद गरेको खुलेपछि उक्त जग्गा जफतको फैसला भएको थियो ।
फ्लाई दुबईको जहाजमार्फत् १० पुस २०७९ मा चिनियाँ नागरिक लि ह्यानसङ्गले सुटकेशमा राखेर भेपभित्र लुकाएर सुन ल्याएका थिए । सुनले भरिएको उक्त सुटकेश शंकास्पद देखिएपछि विमानस्थल भन्सारले नियन्त्रणमा लिएको थियो । त्यतिबेला भेपमा सुन भए(नभएको यकिन हुन बाँकी नै थियो । भन्सारले पासपोर्ट समेत लिएर चिनियाँ नागरिक होसाङलाई छाड्यो । भोलिपल्टै चिनियाँ नागरिक होसाङले आफ्नो पासपोर्ट लिएर स्वदेश फर्किए । पछि एकाएक उक्त भेप गायव पारेर बेचेको खुलेपछि सुन तस्करीको रहस्य बाहिरिएको थियो । त्यसपछि सीआईबीले यसको अनुसन्धान गरेको थियो ।
© 2026 All right reserved to nepalraibar.com
Design & Developed By 
चर्चित अपडेट
ताजा
