बाल यौन शोषण मुद्दामा पुर्पक्षका लागि महोत्तरी कारागारमा रहेको तपस्वी रामबहादुर बम्जनको मुद्दामा सर्लाही जिल्ला अदालतले पीडित बालिकाको जन्मदर्ता झिकाउन आदेश दिएको छ ।
आज शुक्रबार जिल्ला अदालतका न्यायाधीश विनोद गौतमको एकल इजलासले पीडित बालिकाको जन्मदर्ता प्रमाणपत्र पेश गर्न आदेश दिएको श्रेस्तेदार सदन अधिकारीले जानकारी दिए । सर्लाही जिल्ला अदालतमा वादीको तर्फबाट जिल्ला सरकारी वकिलको कार्यालय मलंगवाका जिल्ला न्यायाधिवक्ता कैलाश दाहालले बहस गरेका थिए । यस्तै प्रतिवादीको तर्फबाट सीताराम घिमिरे, दिलिप झा, मनोहर झालगायतका कानुन व्यवसायीले बहस गरेका थिए ।
बाल यौन शोषण मुद्दामा सर्लाही जिल्ला अदालतको आदेश अनुसार बम्जन गत पुस २६ गतेदेखि पुर्पक्षका लागि महोत्तरी कारागारमा छन् । बम्जनलाई काठमाडौँबाट कडा सुरक्षाका साथ सर्लाही जिल्ला अदालतमा हाजिर गराइएको थियो ।
यसअघि अदालतले तीन पटक मुद्दालाई पेसीमा चढाएको थियो तर मुद्दाका प्रतिवादीको तर्फबाट दुई पटक पेसी सारिएको थियो । एक पटक सरकारी वकिलको मागअनुसार पेसी सारिएको श्रेस्तेदार अधिकारीले जानकारी दिएका छन् ।
© 2026 All right reserved to nepalraibar.com
Design & Developed By 
चर्चित अपडेट
ताजा
