.gif)
राष्ट्रिय स्वतन्त्र पार्टी (रास्वपा) को आज बसेको केन्द्रीय समितिको बैठकले विदेशमा रहेका नेपाली नागरिकहरुका लागि मताधिकारको व्यवस्था गर्न सरकार र सम्बन्धित निकायहरुको गम्भीर ध्यानाकर्षण गराउने अभियान सञ्चालन गर्ने भएको छ ।
पार्टीको आज बसेको केन्द्रीय समितिको बैठकले सो निर्णय गरेको हो । त्यस्तै पार्टी सभापति रवि लामिछानेमाथि भएको राजनीतिक प्रतिशोध विरुद्ध जनताको हस्ताक्षर अभियानलाई देशव्यापी रुपमा प्रभावकारी बनाउन केन्द्रीय समितिको तर्फबाट संगठन निर्माणका हरेक गतिविधि सँगसँगै प्रभावकारी बनाइने समेत निर्णय भएको छ ।
आजको बैठकले पार्टीको संस्थापक केन्द्रीय सदस्य इश्रामुल्ला मियालाई केन्द्रीय सदस्यको जिम्मेवारी पुनः दिने निर्णय गरेको छ । उहाँले हज कमिटीको अध्यक्षमा नियुक्ति हुँदा पार्टीको केन्द्रीय सदस्यबाट राजीनामा दिनु भएको थियो । पार्टीको रिक्त विभिन्न विभाग तथा समितिहरुमा देहायका जिम्मेवारीमा सदस्यहरुलाई मनोनयन गरेको छ । जसमा केन्द्रीय श्रम तथा उपभोक्ता हित विभाग प्रमुखमा काठमाडौँका श्याम बाबु गौतम, केन्द्रीय सार्वजनिक लेखा समीक्षा विभाग प्रमुखमा नवलपुरका गोकुल सापकोटा, मधेस प्रदेश समितिको सहमहामन्त्रीमा बाराका गणेश धिमाल र सिरहाकी पुनम शाह र केन्द्रीय श्रम तथा उपभोक्ता हित विभागको प्रमुखमा नवलपुरका ललित श्रेष्ठलाई जिम्मेवारी दिएको प्रवक्ता मनिष झाले जानकारी दिएका छन् ।
पार्टीले सम्पादन गर्नुपर्ने विभिन्न रणनीतिक कार्यहरू सम्पादन गर्नका लागि रणनीतिक समूहहरू गठन गर्ने र पार्टीको संगठन वडादेखि जिल्ला हुँदै प्रदेश र केन्द्रसम्म सशक्त बनाउन र आवश्यक सबलीकरणका लागि केन्द्रीय समितिका सबै सदस्यहरू तथा केन्द्रीय विभागका सबै सदस्यहरूलाई जिल्ला जिल्लामा परिचालन गर्ने पनि कार्यक्रम रहेको छ ।
.jpeg)
.gif)
