.gif)
संयुक्त राज्य अमेरिका सरकारले यही अगस्ट ५ देखि नेपाली नागरिकका लागि दिइएको अस्थायी सुरक्षा स्थिति (टीपीएस) खारेजीको निर्णयलाई त्यहाँको एक अदालतले आगामी नोभरम्बर १८ सम्मका लागि स्थगित गरेको छ ।
टीपीएस खारेजीबिरुद्ध नर्दन डिस्ट्रिक्ट अफ क्यालिफोर्नियाको संघीय अदालतमा परेको रिटमा मंगलबार भएको सुनुवाईपछि निर्णय बिहिबार अदालतले नेपालीको टीपीएस आगामी नोभेम्बर १८ सम्मका लागि स्थगित गर्ने निर्णय गरेको हो ।
अदालतलले यस मुद्दालाई उच्च प्राथमिकतामा राख्दै चरणबद्ध सुनुवाई गर्ने र नोभेम्बर १८ मा हुने सुनुवाईपछि टीपीएस खारेजी स्थगन वा थपिनसक्ने निर्णयमा उल्लेख छ । सो निर्णयले तत्कालका लागि नेपालीको टीपीएस अब कम्तीमा नोभेम्बर १८ सम्मका लागि जोगिएको छ । अमेरिकामा यो सुविधा लिइरहेका करिब ७ हजार नेपाली छन् । त्यसैगरी ५१ हजार होन्डुरन र ३ हजार निकारागुआनले पनि यो सुविधा लिएको एपीले उल्लेख गरेको छ ।
अदालतले अगस्ट १४, २०२५ लाई प्रारम्भिक मुद्दा व्यवस्थापन सम्मेलनको लागि सुरक्षित राखेको छ भने अक्टोबर ९, २०२५ लाई थप मुद्दा व्यवस्थापन सम्मेलनको रूपमा र नोभेम्बर १८, २०२५ को दिउँसो २ बजे प्रारम्भिक निषेधाज्ञा सुनुवाइको लागि सुरक्षित राखेको छ । नेशनल टीपीएस एलायन्स र सात व्यक्तिगत वादीहरूले जुलाई ७, २०२५ मा ट्रम्प प्रशासनको विरुद्ध मुद्दा दायर गरेका थिए। यो मुद्दाले होन्डुरस, नेपाल र निकारागुआका नागरिकहरूको लागि टीपीएस अन्त्य गर्ने ट्रम्प प्रशासनको निर्णयलाई चुनौती दिएको छ ।
टीपीएस खारेजीको निर्णयबिरुद्ध मुद्दा दायरकर्ताहरुले प्रशासनिक प्रक्रिया ऐनको उल्लङ्घन, जातीय द्वेषका कारण संवैधानिक उल्लङ्घन, र पर्याप्त संक्रमण अवधिको प्रावधानमा असफलताको आरोप लगाएका छन् ।
मंगलबारको सुनुवाइमा न्यायाधीश त्रिना एल थम्पसनले मुद्दाको महत्त्वलाई जोड दिँदै वकिलहरूलाई विस्तृत तयारी सुनिश्चित गर्न अग्रिम प्रश्नहरू उपलब्ध गराएको बताएका थिए । उनले आफूले समीक्षा गरेको जानकारीको विशालतालाई स्वीकार गर्दै आफूलाई पचाउनको लागि धेरै जानकारी भएको र आफूले रातभरि समेत नसुतेर त्यसलाई अध्ययन गरेको बताएकी थिइन् । उनले पक्षहरूलाई देशअनुसार सामग्रीहरू व्यवस्थित गरेकोमा धन्यवाद दिएकी थिइन् ।
न्यायाधीश थम्पसनले होन्डुरस, नेपाल र निकारागुआका टीपीएसवाहकहरू कानुन पालन गर्ने व्यक्तिहरू रहेको र कसैले पनि अपराध नगरेको उल्लेख गर्दै भनिन्, ‘कसैले पनि अपराध गरेका छैनन्। यी यस्ता व्यक्तिहरू हुन् जो विपत्तिको चपेटामा अमेरिकाको खुल्ला हातमा आएका थिए ।’
.jpeg)
.gif)
