.gif)
मध्य बर्खामै पनि विभिन्न औद्योगिक करीडोरहरुमा उद्योगहरुले करिब ८ देखि १० घण्टासम्म लोडसेडिङको सामान गरिरहेको नेपाल चामल तेल दाल उद्योग संघका कार्यकारी सदस्य विभोर अग्रवालले बताएका छन् । अग्रवालका अनुसार उद्योगहरुमा यतिबेला धेरै समस्या छ । आजको दिनमा पनि मोरङ सुनसरी करीडोरमा करिब ७ देखि ८ घण्टा र पर्सातिरका उद्योगहरुमा ८ देखि १० घण्टा लोडसेडिङ छ । बर्खाको सिजन सुरु भएको छ अब विस्तारै केही सहज हुन्छ कि भन्ने आशा भएपनि ग्रिडहरुमा समस्या रहेको कारण पर्याप्त मात्रामा विद्युत आपुर्ति हुन नसकेको हो ।
‘उद्योगहरु एउटा मोसनमा चलिरहेका हुन्छन त्यहाँ बारम्बार पावर कट भयो भने विद्युतको मोसन रोकिन्छ । अझ धान–चामलको उद्योगमा त यस्तो खालको पावर कटले धान नै बिग्रने अवस्था हुनसक्छ । ड्रायर मेसिनहरुमा भएको धान सड्ने अवस्थामा पुग्न सक्छ,’ उनले भने । ‘यदि लाइन कटहुन्छ भने उद्योगहरुलाई अग्रिम जानकारी दिएर मात्रै विद्युत काट्नुपर्छ । ग्रिड वा कुनै पोलमा समस्या आउँदा त्यसलाई छिटोभन्दा छिटो निवारण गर्नुपर्छ ।’
उद्योग चलाए बापत उद्योगीले विद्युतको तिर्ने बिलको तुलनामा जनेरेटरको लागत करीब ६ गुणा बढी हुन्छ । यस्तो अवस्थामा उद्योगमा दिनमा ८ देखि १० घण्टा लोडसेडिङ गर्नेहो उद्योग चल्न समस्या हुने उनको भनाई छ । अहिले गर्मीको कारणले गर्दा पावर तलमाथि भएर उद्योगको मुख्य स्वीच पनि आफैं ट्रिप हुने गरेको पनि उनले बताए । मोरङ सुनसरी कोरिडोरका उद्योगहरुमा पहिले नै जानकारी दिएर बत्ति काट्ने गरिएको भएपनि वीरगन्जतिरका उद्योगहरुमा अचानक १०÷१० मिनेटमा लाइन आउने र जाने गरेको उनले बताए । बरु विद्युत प्राधिकरणले डेडिकेटेड हिसाबले लाइन काट्ने गरेमा उद्योगीहरु पनि तयारी अवस्थामा वस्न सहज हुने उनको भनाई छ ।‘जानकारी दिएर काटेमा त्यो समयमा बरु उद्योग सफा गर्ने, स्टक म्यानेजमेन्टको काम गर्छौं । तर अचानक लाइन काट्दा उद्योगहरु ठुलो समस्यामा छन,‘ उनले बताए ।
धान उत्पादन सम्बन्धी सरकारी तथ्यांक गलत छ
अग्रवालले धान उत्पादनका सम्बन्धमा कृषि तथा पशुपन्छी विकास मन्त्रालयले जारी गर्ने गरेको तथयांक गलत भएको दाबी गरेका छन् ।
धान उत्पादनका सम्बन्धमा कुरा गर्दा सबैभन्दा पहिला हामीले हाम्रो पृष्ठभुमि बुझ्नुपर्ने बताउँदै आजभन्दा करीब २५ देखि ३० वर्ष अघिसम्म खाद्य संस्थानले बार्षिक २५ देखि ३५ हजार मेट्रिक टन चामल निर्यात निर्यात गरेको रेकर्ड भएको उनले बताए ।
‘आज हामी सबै किसिमका खाद्यान्न दाल, चामल नुन आदीमा परनिर्भर भएका छौं । हाम्रा पुर्खाले त हामीलाई उब्जाउ जमिन दिएर गए । जसमा हामीले धान फलाएको भए, हाम्रो कृषिलाई समर्थन गरेको भए आज हामी सायद निर्यात गर्ने बारेमा छलफल गथ्र्यौं । यसवर्ष नेपालले कति निर्यात गर्यो भन्ने बिषयमा छलफल गर्ने अवस्थाा हुन्थ्यौं । निर्यातको सम्भावनाको कुरा गर्न सक्छौं तर निर्यातको कुरा गर्नसक्दैनौं किनभने आयात गर्ने मुलुकमा पर्दछौं । अहिले यस्तो अवस्थामा छौं कि आयात बन्द गर्यौंभने खाद्यान्न व्यवस्थापन गर्न र दालचामल खान सक्ने अवस्थाको पनि टुंगो छैन,’ उनले भने ।
यसवर्ष संघले आजको दिनसम्ममा लगभग साढे २ लाख टन चामल र ५ लाख टन धान आयात गरेको उनको भनाइ छ । कृषि मन्त्रालयको रेकर्ड हेर्ने हो भने मन्त्रालयले ऐतिहासिक ५९ लाख टन धान फलाएका छौं भन्ने तथ्यांक सावर्जनिक गरेको उनले बताए ।
विश्व खाद्य कार्यक्रमको अुसन्धानका अनुसार एक नेपालीले प्रतिवर्ष १३५ केजी चामल उपभोग गर्दछन् । यस हिसाबले बार्षिक ५३ देखि ५४ लाख टन धान हाम्रो देशमा फल्यो भने हामीलाई धान आयात गर्ने अवस्था नआउने उनले बताए ।
नेपालमा हरेक दिन दुई हजार मानिस विदेश गइरहेको तथ्यलाई उजागर गर्दै उनले भने,‘प्रत्येक दिन उक्त सङ्ख्यामा मान्छे विदेश गएपछि त खपत त केहि न केहि त घट्नु पर्ने हो । खपत घटिरहेको र धान उत्पादन बढीरहेको अवस्था छ । तर पनि आयात बढ्दै छ । अहिले ११ महिनामा ३९ अर्बको चामल आयात कसरी भयो । यो तथ्यांक कुन हिसाबले जोडेर निकालियो यो त पक्कैपनि सोच्नुपर्ने कुरा हो । सरकारको कृषि मन्त्रालयको हिसाबले ७० लाख टन धान हामीलाई चाहिन्छ । ५९ लाख टन हामीले फलाएका छौं र १०÷११ लाख टन अपुग छ,’ उनले भने ।
यसवर्ष नेपालमा साढे चार लाख टन चैतेधान फलेको सन्दर्भलाई उजागर गर्दै उनले किसानले डेढलाख टन धान पनि बेच्न नसकेको बताए । ‘सरकारले २८ सय भन्दा धेरै समर्थन मूल्य तोक्यो भने पनि किसानले १७÷१८ सयभन्दा धेरै पाउन सकेका छैनन् । किनभने हाम्रो खानाको संस्कृती पनि परिवर्तन छ मिठो मसिनो खानेबानी छ । हामी धेरैजसो जिरा मसिनो चामल खाने गर्छौं, जुन भारतबाट धेरै आयात हुने गरेको छ,‘ उनले भने ।
धान चामल भनेको तेजी मन्दीको खेल भएको उनले बताए । व्यवसायीले धान ल्याएर स्टक गरेर २/३ महिना पछि बेचेभने बढी मूल्य पाउन सक्छु भन्ने आस किसानलाई पनि हुन्छ र मिलर तथा उद्योगीलाई पनि हुने उनको भनाइ छ । आज सस्तो मूल्यमा भण्डारण गरेर स्टकमा नाफा खाने हो भने किसानले पनि बढी मूल्य पाउने बिचौलियाले पनि पाउने र उद्योगीले पनि पाउने तर चैते धानको कुरा गर्ने हो भने किसानले सरकारले तोकेको समर्थन मूल्य पनि पाउन नसकेको उनले बताए ।
चैते धानको जुन २८ प्रतिशत मोइस्चर हुन्छ, त्यसलाई तुरुन्तै ड्राइ गर्न सक्ने अवस्था भएनभने धान सडेर जाने भएकाले किसानले समर्थ मूल्य पाउनलाई ड्रायरको सुविधा पनि राख्नु पर्ने हुन्छ । जुन नेपाल सरकारले दिन सकेको छैन् । त्यसकारण किसानले बाध्यता पुर्वक घाटा बेहोरेर पनि धानलाई बेच्नुपर्ने हुन्छ । त्यसकारणले चैतेधान लगाउने किसानलाई सार्है समस्या आउने गरेको उनले बताए ।
मुद्रा स्फीती घटेपनि महंगी किन घटेन ?
आज सर्वसाधारण मान्छेहरुले मूल्यवृद्धिको मार थेगिराख्नु परेको अग्रवालले बताए । नेपाल राष्ट्र बैैंकका अनुसाार मुद्रा स्फीती ५ प्रतिशत बाट घटेर २.७५ प्रतिशत सम्म आएको भएपनि खाद्यान्न उत्पादनहरुको मूल्य बजारमा बढेको उनले बताए । ‘मुद्रा स्फीती घटेपनि किन चामल र दाल लगायत खाद्यान्नको मूल्य घटेको छैन् । किनकी हाम्रो देशमा अधिकांश जसो खाद्यान्न भारतबाट आयात हुन्छ । अयात गर्दा देखिको लागत र हामीले सरकारलाई तिर्नुपर्ने करका कारण हामीलाई खाद्यान्न महंगो नै पर्न जान्छ । त्यसकारण सर्वसाधारण मान्छेहरु महंगीको मारमा छन,’ उनले भने । चोरी पैठारीको समस्याका कारण पनि बजार चलायमान नहुँदा मूल्य घट्न सक्ने अवस्था नभएको उनको भनाई छ ।
.jpeg)
.gif)
