‘सहकारी ठगीको आरोपबारे ममाथि संसदीय छानबिन होस्’
सत्तारुढ नेपाली कांग्रेसका उपसभापति तथा पूर्वमन्त्री धनराज गुरुङले आफूमाथि लागेका आरोपका विषयमा संसदीय छानबिन गर्न माग गरेका छन् । आज मंगलबार प्रतिनिधिसभा बैठकको विशेष समयमा बोल्दै उपसभापति गुरुङले आफूले निष्ठा र नैतिकताको राजनीतिक गर्ने भएकाले सहकारी ठगीको आरोपबारे छानबिन गर्न सभामुख र गृहमन्त्रीलाई आग्रह गरेका हुन् ।
मितेरी सहकारीको रकम हिनामिनाको विषयमा पूर्व श्रीमती ज्योती गुरुङसँग आफ्नो नाम जोडिएकोप्रति ध्यानाकर्षण भएको उनले बताएका छन् । ललितपुरस्थित मितेरी सहकारी संस्थाको १५ करोड रकम हिनामिनामा नाम जोडिएपछि आज संसद बैठकमा स्पष्टीकरण दिँदै उनले त्यसको खण्डन गरेका हुन् । उपसभापति गुरुङले पूर्वपत्नीले गरेको बदमासीको जिम्मा आफूले नलिने समेत बताए ।
सो सहकारीका अध्यक्ष कुम्भराज गुरुङले पूर्वमन्त्री समेत रहेका धनराज र उनकी पत्नी ज्योतीले पैसा फिर्ता गर्ने सहमति गरे पनि अहिलेसम्म फिर्ता नगरेको भन्दै संसदीय विशेष समितिमा बयान दिएका थिए । सहकारीको प्रवन्ध निर्देशक रहेकी ज्योती र धनराजको सम्बन्ध बिच्छेद भइसकेको बताइएको छ । उपसभापति गुरुङले व्यापार व्यवसायमा श्रीमान–श्रीमतीमा एउटा जोडिँदा अर्कोलाई जोडेर हेरिने सामान्य रहेको टिप्पणी गरेका छन् । ‘पूर्व श्रीमतीलाई जोड्न व्यवहारिक कानुनी र नैतिक दृष्टिले मिल्दैन भन्ने हेक्का राखिनु पर्छ । विवाह गर्नु अपराध होइन । मिल्न नसक्दा डिभोर्स गर्नु पनि अपराध होइन,’ उनले भने ।
उपसभापति गुरुङले परिवारमा दरार आएपछि १० वर्षको बच्चा हुर्काउन पर्दाको पीडा पनि संसदमा पोखे । नेल्सन मण्डेलाको श्रीमतीसँग सम्बन्ध विच्छेद भएको र बिनी मण्डेलाका मुद्दाहरू आए पनि नेल्सन मण्डेलामाथि प्रश्न नआएको उनले बताए । उनले सहकारीको प्रबन्ध निर्देशक ज्योतीसँग २९ फागुन २०७६ मा गरेको सम्बन्धविच्छेद नक्कली प्रमाणित गर्न पनि चुनौती दिए । उनले आफू प्रमाण लुकाउने जिम्मेवार पद (गृहमन्त्री) मा नरहेको र संसदीय छानबिन गर्नुपर्छ भने पनि तयार रहेको बताए ।
© 2026 All right reserved to nepalraibar.com
Design & Developed By 
चर्चित अपडेट
ताजा
