‘कांग्रेस–एमालेबीचको सहमति टिक्दैन’
स्वतन्त्र सांसद डा. अमरेशकुमार सिंहले तीन नेताभन्दा बाहिर कोही प्रधानमन्त्री बन्न खोजे उ भस्म हुने टिप्पणी गरेका छन् । प्रधानमन्त्रीको विश्वासको माग माग्ने प्रस्तावमाथिको छलफलमा भाग लिन संसद्को रोष्ट्रममा उभिएका डा. सिंहले जहाँ जहाँ सम्झौता भए पनि प्रधानमन्त्री हुने तीन नेता मात्र भएको बताए ।
‘जहाँ जहाँ जस्तोसुकै सम्झौता गर्नुस् प्रधानमन्त्री हुने तीनजनामध्ये हो, चौथो व्यक्ति प्रधानमन्त्री हुन खोज्यो भने उ भस्म हुन्छ’, डा.सिंहले भने, ‘यो देश बिग्रिएको जिम्मा उहाँहरूले लिनु पर्दैन । हामी त यो रोष्ट्रममा उभिएर कहिले काहिँ बोल्न पाएका छौँ । यो देश बिग्रेको जिम्मा हामीले लिने ?’
सांसद डा.अमरेशकुमार सिंहले कांग्रेस–एमालेबीचको सहमति लागू नहुने दाबी गरेका छन् । प्रतिनिधि सभाको बैठकमा बोल्दै सांसद सिंहले अहिलेसम्म दलहरूबीच भएको सहमति कार्यान्वयन नभएको उदाहरण दिँदै यो सहमति पनि कार्यान्वयन नहुने दाबी गरेका हुन् ।
सांसद सिंहले अहिले देश तीन प्रमुख नेताले चलाइरहेको दाबी गर्दै अहिलेसम्मको देशको हालतका लागि उनीहरूले जिम्मेवारी पनि नलिएको बताए । सांसद सिंहले कुनै पनि दलमा लोकतन्त्र नभएको दाबी गर्दै उनले प्रधानमन्त्रीले पाँच वर्षे कार्यकाल पूरा गर्न नसकेको विषयको खोजी गर्नुपर्ने बताए । सांसद सिंहले प्रधानमन्त्रीले राखेको विश्वासको मतको विपक्षमा मतदान गर्ने बताए ।
© 2026 All right reserved to nepalraibar.com
Design & Developed By 
चर्चित अपडेट
ताजा
