.png "ncell")
 (1).gif "machhapuchhre bank")
चालु आर्थिक वर्षको १० महिनामा बैंक तथा वित्तीय संस्थाले ५३ अर्ब बढी नाफा कमाएका छन् । राष्ट्र बैंकको तथ्यांकअनुसार चालु आवको वैशाखसम्म (क), (ख)र (ग) वर्गका बैंक तथा वित्तीय संस्थाहरूले कुल ५३ अर्ब १९ करोड रुपैयाँ नाफा कमाएका हुन् ।
यसमा (क)वर्गका वाणिज्य बैंकले यो अवधिमा ४८ अर्ब ६० करोड रुपैयाँ नाफा कमाएका छन् । त्यस्तै विकास बैंकले ४ अर्ब १७ करोड र फाइनान्स कम्पनीहरूले ४१ करोड रुपैयाँ नाफा कमाएका छन् । राष्ट्र बैंकका अनुसार वाणिज्य बैंकहरूमा सबैभन्दा धेरै नाफा गर्नेमा नबिल बैंक पहिलो नम्बरमा छ भने नेपाल बैंक नाफाका आधारमा पछाडि छ ।
चालु आवको १० महिनामा नबिल बैंकले ५ अर्ब ४६ करोड रुपैयाँ नाफा गरेर अग्रस्थानमा आउँदा सरकारी स्वामित्वको नेपाल बैंक लिमिटेड ५९ करोड रुपैयाँसहित अन्तिम स्थानमा छ । यस्तै नाफा कमाउनेमा ४ अर्ब १२ करोड रुपैयाँसहित ग्लोबल आईएमई बैंक दोस्रो नम्बरमा छ भने नेपाल इन्भेस्टमेन्ट मेगा बैंक ३ अर्ब ७७ करोड रुपैयाँसहित तेस्रो नम्बरमा छ ।
प्राइम बैंकले ३ अर्ब २२ करोड रुपैयाँ नाफा कमाउँदा एभरेस्ट बैंकले २ अर्ब ९८ करोड रुपैयाँ र कृषि विकास बैंकले २ अर्ब ६९ करोड रुपैयाँ नाफा कमाएका छन् । स्ट्यान्डर्ड चार्टर्ड बैंकले २ अर्ब ६६ करोड रुपैयाँ, राष्ट्रिय वाणिज्य बैंकले २ अर्ब ५६ करोड रुपैयाँ, प्रभु बैंकले २ अर्ब ५० करोड रुपैयाँ, एनएमबी बैंकले २ अर्ब ४८ करोड, हिमालयन बैंकले २ अर्ब २२ करोड र एनआईसी एसिया बैंकले २ अर्ब १६ करोड रुपैयाँ नाफा कमाएका छन् ।
यी बाहेकका बैंकहरूले भने नाफामा २ अर्बको क्लबमा पुग्नसकेका छैनन् । यसअनुसार सिद्धार्थ बैंकले १ अर्ब ९७ करोड रुपैयाँ, लक्ष्मी सनराइज बैंक १ अर्ब ९५ करोड, सिटिजन्स बैंक १ अर्ब ५० करोड, कुमारी बैंक १ अर्ब ४२ करोड, नेपाल एसबीआई बैंक १ अर्ब ४२ करोड रुपैयाँ र माछापुच्छ्रे बैंक १ अर्ब १० करोड रुपैयाँ नाफामा देखिएका छन् ।
सबैभन्दा थोरै नाफा कमाउनेमा भने नेपाल बैंक छ । यो बैंकले चालू आवको १० महिनामा ५९ करोड रुपैयाँ नाफा कमाएको छ । तुलनात्मक रुपमा नेपाल बैंकको नाफा विकास बैंकको नाफाभन्दा कम देखिन्छ। मुक्तिनाथ विकास बैंक र गरिमा विकास बैंकको नाफा नेपाल बैंकभन्दा बढी छ ।
विकास बैंकतर्फ भने मुक्तिनाथ र गरिमा अगाडि छन्। चालू १० महिनामा मुक्तिनाथ विकास बैंक ९९ करोड रुपैयाँ नाफासहित अगाडि छ भने दोस्रो नम्बरमा ७५ करोड रुपैयाँसहित गरिमा विकास बैंक छ । यस्तै वित्त कम्पनीहरूमा भने २० करोड रुपैयाँ नाफासहित मन्जुश्री फाइनान्स कम्पनी सबैभन्दा अगाडि छ । समग्रमा चालु १० महिनामा सर्वाधिक कमाउनेमा वाणिज्य बैंकतर्फ ५ अर्ब ४६ करोड रुपैयाँसहित नबिल बैंक, विकास बैंकतर्फ झण्डै एक अर्ब रुपैयाँसहित मुक्तिनाथ विकास बैंक र फाइनान्सतर्फ २० करोड रुपैयाँसहित मन्जुश्री फाइनान्स कम्पनी अगाडि छन् ।
.gif "unitedajod")
© 2026 All right reserved to nepalraibar.com
Design & Developed By 
चर्चित अपडेट
ताजा
 (1) (1).gif "muktinath")
.png "tulsipur")
