'जनताको भरोसा जित्न सके मात्रै सरकार र नयाँ समीकरणको औचित्य पुष्टि'
प्रधानमन्त्री पुष्पकमल दाहाल प्रचण्डले अहिलेको सत्ता समीकरणले पनि काम गर्न नसके देश अप्ठेरो अवस्थामा जाने बताएका छन् । मंगलबार सत्ता गठबन्धनमा रहेका पाँच राजनीतिक दलको साझा संकल्प सार्वजनिक कार्यक्रममा उनले जनतामा आशा जगाउनकै लागि यो गठबन्धन बनाएको बताए ।
आफू प्रधानमन्त्री भएपछि तेस्रोपटक संकल्प प्रस्ताव सार्वजनिक गरिएको स्मरण गर्दै प्रधानमन्त्री प्रचण्डले भाषमा संकल्प प्रस्ताव कस्तो बनायौं भन्दा पनि जनतालाई सेवा प्रवाह गर्ने क्रममा कति गम्भीर, जिम्मेवार र तत्पर भएर अगाडि बढ्छौँ भन्ने कुराले यसको र समीकरणको औचित्य पुष्टि गर्ने बताए ।
‘नयाँ आशा जगाउने उद्देश्य र समृद्धिको नयाँ यात्रामा जानुपर्छ भन्ने उद्देश्यका साथ नयाँ समीकरण बनेको हो। यसैलाई ध्यान दिएर साझा संकल्प ल्याइएको छ ’, उनले भने, ‘कार्यान्वयनमा पनि तदारुकता र गम्भीरता आवश्यक छ । त्यसपछि मात्र यसको औचित्य पुष्टि हुनेछ ।’ प्रचण्डले अहिले बनेको नयाँ समीकरणले पनि जनतामा भरोसा जगाउन नसके देश अप्ठ्यारोमा जाने खतरा औंल्याए ।
नयाँ समीकरण बनिसके पछि केही दिनभित्रै राम्रा काम अघि बढेका प्रधानमन्त्री प्रचण्डको भनाइ छ । ‘मिटरब्याज, लघुवित्त, सहकारी समस्या होस् वा दशौं महिनादेखि माइतीघर मण्डलामा न्यायका निम्ति आवाज उठाउनेहरुका समस्या पनि सम्बोधन गर्ने प्रक्रिया सुरु गरिसकिएको छ’, प्रचण्डले भने, ‘समाजमा अराजकता फैलाउने, जे मन लाग्यो त्यही बोल्दै हिँड्ने प्रवृत्तिलाई पनि नियन्त्रण गर्ने प्रक्रियामा अघि बढ्छौँ।’
भ्रष्टाचार र वेथितीमा संलग्न जो कोही भए पनि सुशासनका पक्षमा काम गरिने उनले स्पष्ट पारे । नयाँ गठबन्धन बनेको केही दिनमा नै राम्रो काम भएको भन्दै प्रधानमन्त्री प्रचण्डले सडकमा जायज माग राखेर भइरहेका विरोधलाई सम्बोधन गरिएको बताए । सडकमा जथाभावी माग राखेर हिँड्नेहरुलाई भने कारबाही गर्ने उनले बताए ।
प्रधानमन्त्री प्रचण्डले कर्मचारीहरुलाई पनि विगतको भन्दा नयाँ ढंगले काम गर्न निर्देशन दिए । ‘हिजोको घोषणा र आजको घोषणा, हिजोको परिस्थिति र आजको परिस्थितिमा फरक आएको छ । विकास र समृद्धिको यात्रा प्रारम्भ गर्दैछौं भनेर सेवा प्रवाह गर्नुपर्छ’, उनले भने, ‘फेरि एकचोटी हामीले कामद्वारा, परिणामद्वारा जनताको भरोसा जित्नुछ ।’
© 2026 All right reserved to nepalraibar.com
Design & Developed By 
चर्चित अपडेट
ताजा
