रौतहटबाट नक्कली नोटसहित एकजना पक्राउ

नेपाल रैबार
शुक्रवार , पौष २०, २०८०

रौतहटको देवाही गोनाही नगरपालिका–८, पटेल चोकबाट नक्कली जस्तो देखिने नेपाली नोट सहित एकजना पक्राउ परेका छन् । गुजरा नगरपालिका–५, हरिहरपुर बस्ने २५ वर्षीय सन्दीप यादवलाई बिहीबार साँझ प्रहरीले पक्राउ गरेको हो ।

उनको साथबाट एक हजार दरको एक हजार ८४३ थान नक्कली नोट बरामद गरिएको प्रहरीले जनाएको छ ।

इलाका प्रहरी कार्यालय देवाही गोनाहीबाट खटिएको प्रहरीले उनलाई उक्त नक्कली नोट, विभिन्न बैंकको एटीएम कार्ड पाँच थान र १६ लाख ६५ हजार रूपैयाँ उल्लेख भएको चेक तीन थानसहित पक्राउ गरेको जनाइएको छ ।